पंढरपूर मधील डॉक्टरचा कोरोनामुळे मृत्यू ; पंढरपूर तालुक्यात आजपर्यंत कोरोनाने घेतले २८ बळी

पंढरपूर : पंढरपूर शहरातील, अनेक दिग्गज व्यक्ती कोरानाचे बळी होत असतानाचे आढळून येत आहे. दि.१३ ऑगस्ट रोजी राष्ट्रवादी काँग्रेसचे जिल्हा कार्याध्यक्ष राजुबापू पाटील यांचा कोरोनामुळे मृत्यू झाल्याची घटना ताजी असतानाच आज पंढरपूर मध्ये पेशाने डॉक्टर असलेल्या सचिन रामलाल दोशी वय (४०) यांचा मृत्यू झाला आहे.

दोशी यांना पंधरा दिवसांपूर्वीच कोरोनाची लागण झाली होती. त्यांना उपचारासाठी पुणे येथील नोबेल हॉस्पिटल मध्ये दाखल करण्यात आले होते. मात्र उपचार सुरू असतानाच आज (शुक्रवारी) पहाटे त्यांचे निधन झाले. पंढरपूरसह कासेगाव ता. पंढरपूर येथील भागात आपल्या वैद्यकीय सेवेने व चांगल्या स्वभावामुळे एक उत्तम डॉक्टर म्हणून परिचित होते. पंढरपूर तालुक्यातील वैद्यकीय क्षेत्रातील व्यक्तीची, कोरोनामुळे मृत्यू होण्याची हि पहिलीच घटना घडली आहे. आजपर्यंत पंढरपूर तालुक्यात डॉ.दोशी यांच्यासह एकूण २८ जणांचा बळी गेला आहे.त्यांच्या मागे पत्नी आणि एक मुलगी असा परिवार आहे.

पंढरपूर मधील पोलीस, राजकीय व्यक्ती आणि डॉक्टर अशा दिग्गज व्यक्तींच्या मृत्यूमुळे पंढरपूर शहर व परिसरामध्ये मोठ्या प्रमाणात शोककळा पसरली आहे.