पुरग्रस्त बांधवांचा दसरा “हसरा” व्हावा म्हणून मैंदर्गीतील छत्रपती प्रतिष्ठान कडून अन्नधान्य वाटप

अक्कलकोट : गेल्या आठ दहा दिवसांपुर्वी झालेल्या अतिवृष्टी मुळे अक्कलकोट तालुक्यातील बोरी नदिला मोठ्या प्रमाणात पूर आले होते. यात बोरी नदीलगतच्या अनेक खेड्यागावांमध्ये घराघरात पाणी शिरून मोठ्या प्रमाणात नुकसान झाले, यातच अवघ्या जगाचा पोशिंदा असलेल्या शेतकऱ्याचे उभे पिक पुरपरिस्थीतीमुळे जमिनदोस्त झाले. यामुळे मायबाप शेतकऱ्यांवर आभाळ कोसळले.
मैंदर्गी येथील छत्रपती प्रतिष्ठान या सामाजिक संस्थेने सदस्यांच्या मदतीच्या माध्यमातून रामपूर (बोरी उमरगे) तसेच आंदेवाडी येथील पुरग्रस्त बांधवांचे दसरा सण ” हसरा” व्हावा या उद्देशाने फुल ना फुलाची पाकळी म्हणून जिवनावश्यक वस्तू मदत म्हणून देण्याचे ठरविले.

सुमारे १०५ कुटुंबांना २ किलो गहू पीठ, २ किलो तांदूळ, पाऊणकिलो दाळ, एक किलो तेल अशा जिवनावश्यक वस्तूंचे किट तयार करून वाटप करण्यात आले, यावेळी दोन्ही गावातील सरपंचांनी या सहयोगाबद्दल सह्रदयी आभार व्यक्त केले.अन्नधान्य वाटप यशस्वीरीत्या पार पाडण्यासाठी संस्थेतील सर्व सदस्यांनी परिश्रम घेतले.