पुणे प्रतिनिधी (दयानंद गौडगांव): पुण्यात कँप परिसरातील छत्रपती शिवाजी मार्केट यार्डमध्ये असलेल्या चिकन आणि मच्छीच्या दुकानांना भिषण आग लागल्याची घटना घडली आहे. ही घटना आज पहाटेच्या सुमारास घडली असून ही आग शाॅर्ट सर्किटमुळे लागली असल्याचे प्राथमिक अंदाज व्यक्त करण्यात येत आहे.
पुणे शहरातील कॅम्प परिसरात असलेले छत्रपती शिवाजी मार्केट हे सर्वात जुने मार्केट आहे. या मार्केटमध्ये मंगळवारी पहाटे आगीने तांडव घातलं. अग्निशमन दलाच्या अधिकाऱ्यांनी दिलेल्या माहितीनुसार, पुणे शहरातील कॅम्प परिसरात छत्रपती शिवाजी मार्केटमध्ये मच्छी, चिकन आणि अन्य वस्तूंची विक्री मोठ्या प्रमाणावर होत असते. मार्केटमध्ये आज पहाटे पावणेचार वाजण्याच्या सुमारास आग लागल्याची माहिती आम्हाला मिळाली, असं अधिकाऱ्यांनी सांगितलं.
या मार्केटमध्ये दुकानांची संख्या मोठ्या प्रमाणात असल्याने, दलाने काही मिनिटांत घटनास्थळी धाव घेतली. तोवर आगीने रौद्ररूप धारण केले होतं. या घटनेत मच्छी विक्रेत्यांची १७ आणि चिकन विक्रेत्यांची ८ अशी २५ दुकाने जळून खाक झाली. ही आग शॉर्टसर्किटमुळे लागल्याची शक्यता असून, ८ गाड्यांच्या मदतीने आग आटोक्यात आणण्यात आली.