कारवर लघुशंका करण्यास मनाई केल्याने कंपनीतील सुरक्षारक्षकाला पेट्रोल टाकून जाळण्याचा प्रयत्न

निगडी :भोसरी एमआयडीसीतील एस. व्ही. एटरप्रायझेस या कंपनीत एक धक्कादायक घटना घडली आहे. कंपनीच्या मालकाची बी एम डब्ल्यू कारवर लघुशंका करत असलेल्या व्यक्तीला कंपनीच्या सुरक्षारक्षकाने रोखल्यामुळे त्याच्यावर पेट्रोल टाकून जाळण्याचा प्रयत्न करण्यात आला आहे. ही घटना मंगळवारी (दि.१७)दुपारच्या वेळेस घडली आहे.

भगवान शंकर वायफळकर (वय ४१, रा. दत्तनगर, चिंचवड) असे गंभीररित्या भाजलेल्या सुरक्षा रक्षकाचे नाव आहे. त्यांनी याबाबत मंगळवारी (दि. १७) एमआयडीसी भोसरी पोलीस ठाण्यात फिर्याद दिली आहे. महेंद्र बाळू कदम (वय ३१, रा. बालाजीनगर, भोसरी) असे अटक केलेल्या संशयित आरोपीचे नाव आहे.

पोलिसांनी दिलेल्या माहितीनुसार, फिर्यादी वायफळकर हे भोसरी एमआयडीसीतील एस. व्ही. एटरप्रायझेस या कंपनीत सुरक्षा रक्षक म्हणून काम करतात. मंगळवारी दुपारी सव्वाचार वाजताच्या सुमारास आरोपी कदम हा फिर्यादी काम करीत असलेल्या कंपनीच्या मालकाच्या बीएमडब्ल्यू कारवर लघुशंका करीत होता. त्यास वायफळकर यांनी येथे लघुशंका करू नको, असे सांगितले. या कारणावरून चिडलेल्या आरोपी कदम याने फिर्यादी वायफळकर यांच्या अंगावर पेट्रोल ओतून त्यांना पेटवून दिले. या घटनेत वायफळकर हे गंभीररित्या भाजले आहेत. एमआयडीसी भोसरी पोलीस तपास करीत आहेत.