बार्शीत महावीर जयंती निमित्त गरजूंना रामभाई शाह रक्तपेढीकढून रक्त, रक्त घटक व कोव्हीड प्लाझ्मा मोफत

बार्शी : बार्शीतील सकल जैन समाजाच्या वतीने कोरोनाच्या पार्श्वभूमीवर भगवान महावीर जन्मकल्याणक महोत्सव  अर्थात महावीर जयंती निमित्त रविवारी (ता.25 एप्रिल) समाजातील गरजूंना बार्शीच्या  श्रीमान रामभाई शाह रक्तपेढीच्या वतीने रक्त, रक्तातील घटक व कोव्हीड प्लाझ्मा मोफत देण्यात येणार असून याचा खर्च सकल जैन समाजाच्या वतीने उचलण्यात येणार असल्याची माहिती बार्शीच्या वर्धमान जैन स्थानक संघाचे अध्यक्ष पारस कांकरिया यांनी दिली.

यावेळी जैन श्वेतांबर ऋषभ मंदिर देवस्थान ट्रस्टचे बार्शीचे अध्यक्ष प्रदीप बागमार, धनुभाई शाह महावीर सेवा संघ ट्रस्ट बार्शीचे अध्यक्ष सुभाष लोढा, वर्धमान जैन वाचनालयाचे अध्यक्ष बाळासाहेब श्रीश्रीमाळ, श्रीमान रामभाई शाह रक्तपेढीचे उपाध्यक्ष अजित कुंकूलोळ, सामाजिक कार्यकर्ते कमलेश मेहता, बाळासाहेब तातेड, अ‍ॅड.दिनेश श्रीश्रीमाळ, दिगंबर जैन समाज बार्शीचे रूपेश देवधरे, प्रवीण मांडवकर उपस्थित होते.

जयंती निमित्त केवळ फोटो किंवा मुर्तीला पुष्पहार अर्पण न करता समाजातील गरजूंना सकल जैन समाजाने नेहमीत मदतीचा हात दिला आहे. मोफत पाणी पुरवठा असो किंवा आता रक्तपुरवठा असो भविष्यातही सकल जैन समाज नेहमीच अभिनव  उपक्रम राबविणार असल्याची ग्वाही प्रदीप बागमार यांनी यावेळी दिली. तसेच कोरोनाच्या पार्श्वभूमीवर गरजूंना रक्त, रक्तघटक व प्लाझाची गरज ओळखून हा उपक्रम जंयती निमित्त यावेळी राबविण्याचे सांगितले. दरम्यान जयंती निमित्त समाजातील युवक युवतींनी उस्फूर्तपणे रक्तदान करत महावीर भगवान यांना अभिवादन केले.

महावीर जयंती निमित्त बार्शीच्या श्रीमान रामभाई शाह रक्तपेढीच्या स्व.द.ग.कश्यपी सभागृहात पाच गरजूंना प्रातिनिधिक स्वरूपात बार्शीच्या सकल जैन समाजाच्या वतीने कोरोना प्रतिंधात्मक नियमांचे पालन करत मोफत रक्तपिशव्या वाटप करण्यात आल्या. मागील दोन वर्षापासून कोरोनाच्या पार्श्वभूमीवर सकल जैन समाजाच्या वतीने भगवान महावीर जयंती निमित्त समाज उपयोगी व विधायक उपक्रम राबविण्यात येत असल्याचे सांगत कांकरिया म्हणाले, बार्शी शहर व तालुक्यातील जनतेला सकल जैन समाज बार्शीच्या वतीने मागील तीन वर्षापासून टंचाई काळात टँकरव्दारे मोफत पाणी पुरवठा करण्यात आला. तसेच गरजूंना वेळोवेळी मदतीचा हात दिला आहे. यावर्षी कोरोनाच्या पार्श्वभूमीवर सकल जैन समाजाच्या वतीने महावीर जंयतीचे औचित्य साधून शहर व परिसरातील गरजूंना मोफत रक्तपुरवठा करण्याबरोबरच रक्तातील घटक, पॅक सेल तसेच कोव्हीड प्लाझा आवश्यकतेनुसार मोफत दिला जाणार आहे. या विधायक उपक्रमासाठी बार्शीच्या सकल जैन समाजा बांधवांचे सहकार्य मिळाले आहे. त्याबद्दल ,त्यांचेही आभार कांकरिया यांनी यावेळी मानले.  रविवारी (ता.25एप्रिल) रात्री बारा वाजेपर्यंत गरजूंना मोफत रक्तपुरवठा करण्यात येणार असल्याचे यावेळी रक्तपेढीचे उपाध्यक्ष कुंकूलोळ यांनी सांगितले. ज्या देणगीदारांनी रक्तपुरवठ्यासाठी मदत केली आहे त्या देणगीदारांचे आभार  व्यक्त केले. कार्यक्रमासाठी गोविंद बाफणा, पवन श्रीश्रीमाळ, सागर तातेड, लखन तातेड, प्रशांत बुडूख यांनी परिश्रम घेतले.