कुतूहल न्यूज नेटवर्क
बार्शी: तालुक्यातील भाजपा नेते राजेंद्र मिरगणे यांचं गाव म्हणून नावलौकिक असलेल्या मांडेगावच्या सरपंचांनी आमदार राजेंद्र राऊत यांच्या नेतृत्त्वातील भाजप गटात प्रवेश केला आहे. सरपंच सुधाकर उर्फ पंडित मिरगणे व उपसरपंच देवदत्त मिरगणे यांचे आमदार राऊत यांनी पक्षात स्वागत केले. मांडेगावमधील ग्रामपंचायत कार्यालयातच हा पक्षप्रवेश झाला. त्यामुळे, राजेंद्र मिरगणे यांना हा मोठा राजकीय धक्का असल्याचे मानले जात आहे.
पंडित मिरगणे हे मांडेगावचे सरपंच असून ते राजेंद्र मिरगणे यांचे जवळचे नातेवाईकही आहेत. गेल्या काही दिवसांपासून त्यांच्या भाजपा पक्षप्रवेशाची चर्चाही रंगली होती. मात्र, रविवारी त्यांनी राजेंद्र राऊत यांचे नेतृत्व स्विकारत चर्चेला पू्र्णविराम दिला. पंडित यांनी गावपातळीवर केलेल्या कामाबद्दल त्यांचा लोकमततर्फे गौरव करण्यात आला होता. तसेच, कोरोना काळातील कामाचेही अनेकांनी कौतुक केले होते.
या पक्षप्रवेशावेळी बाजार समितीचे संचालक रावसाहेब मनगिरे, खडकलगांवचे सरपंच दिपक रोंगे, विलास मिरगणे, बबन मिरगणे, सचिन मिरगणे, मनोज मिरगणे, आप्पा आडसुळ, दादा मिरगणे, भारत मिरगणे, सुभाष देवकुळे, आण्णा कवडे, अरविंद मिरगणे, भाजपा तालुका सरचिटणीस मुकेश डमरे व ग्रामस्थ उपस्थित होते.